Iragan larunbatean jokatu zen Euskal Herriko eskolarteko bertsolari txapelketaren XXII. edizioaren finala, Aguraingo Harresi aretoan; bertan gure bertso eskolako Maialen Akizu (txikien mailan) eta Amaia eta Mikel Iturriotz anai-arrebak (handian mailan) izan ziren kantuan. Maialen Akizuk txapela jantzi zuen txikien mailan eta Amaia Iturriotzek bigarren postua erdietsi zuen maila nagusian. Pozik egoteko moduko emaitzak, beraz, beste urte batez.

 

 

 

 (*)  Txikien saioko bertso hautatuak ikusteko, egin klik hemen

(**) Handien saioko bertso hautatuak ikusteko, egin klik hemen

Hamalau urte arteko gaztetxoen mailan herrialde bakoitzeko bi bertsolari izan ziren kantuan, eta Gipuzkoa ordezkatuz, gure bertso eskolako Maialen Akizu eta Aratz Igartzabal gabiriarra izan ziren kantuan. Biek saioaren lehen zati oso ona egin zuten, eta bigarren fasera pasatzea lortu zuten, Aitor Bizkarra (Abadiño), Txaber Altube (Abadiño), Aitor Servier (Azkaine) eta Peru Abarrategi (Aramaio) bertsolariekin batera. Ondorengo argazkian, txikien mailan parte hartu zuten bertsolariak ageri dira:

 

Txikien mailan kantatu zuten bertsolariak; Maialen, goian ezkerretik lehena

 

Bigarren fase horretan, Maialenek gora egin zuen, eta txapela janztea lortu zuen azkenean, ondo merezita. Aipagarria da, “urrea” hitza gaitzat hartuz, Maialenek bota zuen bertsoa: “Brontzea eta zilarra baino / askozaz ere gorago // zenbat bizitza eta zenbat lur / mineral batek akabo // mundu guztia urrean bila / erotu beharren dago // maitasunak bai balio dula / urreak baino gehiago”. Maila honetan, Aitor Bizkarra bizkaitarrak lortu zuen bigarren postua. Abadiñoko bertsolaria fin eta bizi ibili zen haseran, baina amaiera aldera behera egin zuen pittin bat eta ezin izan zion Akizuren erritmoari eutsi.

 

Maialen Akizu, lau oinak emanda kantuan

 

Aratz Igartzabal gabiriarrak, bestalde, bere-bereak dituen umorea eta bizitasuna erakutsi zituen saio osoan zehar, eta etorkizun handiko bertsolaria dela erakutsi zuen beste behin ere.

 

Aratz Igartzabal, kantuan

 

Aratz Igartzabal, Maialen Akizu eta Aitor Servier, saioan

 

Bazkalostean, 14 eta 18 urte bitarteko gazteen saioari ekin zitzaion, eta maila honetan gure taldeko Amaia eta Mikel Iturriotz anai-arrebak izan genituen kantuan, Gipuzkoako ordezkari gisa.

 

Handien mailan kantatu zuten bertsolariak (tartean Amaia eta Mikel)

 

Haseran bertsolari guztiak aritu ziren kantuan, eta sei bertsolarik gainditu zuten epaimahaiaren galbahea, tartean Amaiak: Ainhoa Comas (Amurrio), Txomin Elosegi (Hazparne), Maiana irigoyen (Baiona), Nerea Ibartzabal (Markina), eta Mattin Luku (Donibane Garazi) izan ziren, Amaiarekin batera, galbahea pasa zuten bertsolariak.

 

Iturriotz anai-arrebak, ofiziotan

 

Mikel ere fin aritu zen, baina ofiziotan txispa gehixeagorekin aritzea falta izan zitzaion, agian, bigarren faserako txartela lortzeko. Edozein kasutan, handien mailan kantatu duen lehen urtea izateko aurtengoa, lan bikaina egin du Mikelek, nola Gipuzkoakoan, hala Euskal Herrikoan.

 

Mikel, larunbatean Agurainen kantuan

 

Bigarren fasean, puntuari erantzuteaz gain gai bati bi bertso kantatu behar izan zizkioten bertsolariek. Gaiak honela zioen: “goizeko ordubiak dira eta parrandan zaude lagunekin. Sakeleko telefonoari begiratu eta gurasoek zazpi aldiz deitu dizutela ikusi duzu”. Lehenengo bertsoan, ordularia eta gurasoak izan zituen hizpide Amaiak, tamalez bat ez datozela esanaz. Bigarren bertsoa, honako hau kantatu zuen: “Urtarrilean bete nituen / jada hamazazpi urte // ta festarako ere badaukat / nik nahi adina bertute // basoa hartu dut adiskide / eta taberna arkupe // halare etxera noa oraintxe / bai hori bera det uste // hainbeste ezin dute sufritu / nere kapritxoen truke”.

 

Nerea Ibartzabalek ere maila oso ona eman zuen larunbatean

 

Azkenean, Amaiak bigarren postua lortu zuen, Baionako Maiana Irigoienen atzetik. Bertsolari baionarrak saio erregularra josi zuen, eta bertsotan egoki egiten dakiela erakutsi.

 

Maiana Irigoien, kantuan, Ainhoa Comas aldamenean duela

 

Arratsaldean, bertsolarien agurren eta sari banaketaren txanda iritsi zen, eta bakoitzak bere ingurukoak izan zituen gogoan, bertso eskola, lagunak, familia, herria… eta baita Euskal Herritik urrun daudenak ere. Euskal Herriko finalean parte hartu duten bertsolari guztiek, sari bat izango dute: txikienek, egunpasa bat irailean, eta nagusiek, asteburu pasa. Zorionak denei, lan bikaina egin duzue beste behin ere!