Amaia, sari banaketan

Oporrak bukatu berri diren honetan, albiste pozgarri batek gozatu digu lanerako itzulera gogorra: gazteen mailako Urruzuno lehiaketa entzutetsuan, Amaia Iturriotz gure bertso eskolako kidea saridun suertatu da. Amaiaren lau lan saritu ditu, gainera, Urruzuno lehiaketako epaimahaiak, zeina maila handiko idazleek osatu duten (Miren Agur Meabe, Katixa Agirre, Yolanda Arrieta, Urtzi Urrutikoetxea eta Castillo Suarez). Atzo izan zen sari banaleta Eusko Jaurlaritzak Gasteizen duen egoitzan.

Beñat Lizaso kantuan, alboan Iguaran

Zumarragako Santa Isabel jaien egitarauaren baitan, bertso bazkaria izan zen atzo txosna gunean, bertso eskolak eta Gazte Asanbladak elkarlanean antolaturiko ekintza. Bazkalostean, Hamaika Bertute taldeko Beñat Lizaso azpeitiarra, Beñat Iguaran amasarra eta Manu Goiogana irundarra izan genituen kantuan, eta saio ederra eta umoretsua osatu zuten, entzuleen gozamenerako. Berrogei lagun inguru bertaratu ziren bertso bazkariaren hitzordura eta pozik ziren guztiak amaieran.

Parte hartuko duten bertsolariak

Salgai daude oraindik Zumarragako Santa Isabel jaietako egitarauaren baitan antolatu den bertso bazkarirako txartelak. Ez dira asko geratzen, salmenta puntuetatik adierazi digutenez (Gazteleku, Motz eta Osaba, gogoratu). Txartelak eskuratzeko azken eguna uztailaren 2a izango da eta 9 euroren truke eskuratu daitezke.